من حاره تؤام
لريحة البحر
بتخرج كل يوم طفله
سدرها الفاير
حتتين فريسكا
المسافه بين ضفايرها وحزنها
يادوب..رابطه فيونكا
ف شنطتها القماش
سحابه من حلم البنات
وتلت ودعات
تخرج تنفض تراب النوم
قلبى يحرم
ويبتدى فى الطواف
والبحر
يتوضى ويقيم الصلا
تضحك لنا عيونها ألفين طريق للرزق
وحين ما يفلت
من عباية النوه شعاع م العند
تمسح بديل ضيها
حزن البيوت القديمه
ساعتها.. بفرش سنينى ع الرصيف
واستنى زى الأعلانات ع الدكاكين
ف انتظار ممل
ولما يرفع الهوا طرف الجيبونه
ابتسم وأعيد سؤالى
لحد امتى
هتهربى منى بشفايفك؟
خايفة منى
مش هابوسك
انا ياحبيبتى رغم كل الحكمه فيا
مش محصل حتى حرف
من قاموسك
وف عز ما باشجع ف روحى
يصحينى نقر الشيش
افتح الشباك
المح ف اخر الشارع
خلق ياما
والمحها فى النعش القزاز
اندهش لدرجه الارتعاش
اخرج من رعشه الاندهاش
على صوت درويش
ياحلاوه ام اسماعيل فى وسط عيالها
يرجعنى النقشبدى بصوته الحرير
الاقيها قدامى
وف ايديها النفير
نقيد السبرتاية ويدورالحوار
افتح الشباك واستنى
لما تخرج الطفله
اللى سدرهاالفاير
حتتين فريسكا
والمسافه
بين ضفايرها وحزنها
يادوب
رابطه فيونكا