زمنّا يازمنّا.. ماعرفنالك.. ولابك حل
زمن يفتحلنا باب التعجب وأصبح أعجوبه
زمان الطيبين اللي نخَبره إرتحل.. وأحتل..
مكانه هالزمان السرمدي بسلوم مقلوبه
زمان اول دروب واضحه واللي يضل يدل
وزمنّا ذا تدل أو ماتدل تضلّك دروبه
زمان اول تسامح من قلوبٍ ماتعرْف الغل
وزمنّا ذا بلانيه.. به الزلات محسوبه
نقارن لو نقارن نشعر بحيرة خيال وذل
خطانا هو صواب أو الصواب بفكرنا أكذوبه؟
زمنّا ذا يخلي الناصح المرشد بصدق يمل
ألين يقول:مالي كلٍ ذنوبه على جنوبه
لأنك ياتجاري الكل.. أو تصبح عدو الكل
زمنّا.. العيب به نعتٍ لمن وضّحلنا عيوبه