يا مثالي
أنت لو مره تجي تقعد قْبالي
أترك التمثيل والله أتصير أطعم
يا سخيف
أنت مو مثلي قبل ما تدش مطعم
توقف تْعد الفلوس
وتحزن أكثر
والحزن بالجوع مؤلم
وأيييييه تتنهد
وتبلع عبرتك بصوت عالي
وترجع بجوعك تردد :
الرغيف اليوم غالي
أنت مو منا الفقارى
الفقير الواقعي ماهو مثالي
قد لعبت القايلة كورة
على صاج الشوارع؟
وأنت حافي؟
قد خلاك الفقر يابن الثرية
ما تشارك بأي رحلة مدرسية
مشترط فيها الرسوم؟
قد خلاك الفقر أتفصل أحلامك عليك؟
تحلم أنك تشتري سيكل جديد؟
وتذكر أمك وتقول لا
بشتري لأمي ذهب
قد خلاك الفقر تسمع بكاها لحالها بغرفة بعيدة؟
لأن أخوك اليوم يبكي وقال أبي جزم جديدة؟
وأنت غارق تختنق بدموع أمك
لكن صغيّر فقير
والصغير اللي سواتك ويش بيده؟
قد خلاك الفقر تلعب بنفس اللبس دايم؟
وأنت يابن الناس كل ظهرية تبدّل بجايم؟
وتلبس فنيلة منتخب جديدة وفيها رقم
وحنا فنايلنا قديمة ونكتب أرقام بقلم؟
يا مثالي ياللي ما خلاك همك مثلنا تسهر ليالي
وحنا عْيال الفقارى بيننا أشياء حميمة
حنا نْكب البطاطس مع بعض نعمل عزيمة
ونسوي بيوت بمراكي
و بالبطاطين أن رقدنا نسوي خيمة
ندري أن الضحك واجد والسعادة
دايماً ترجع عواقبهم وخيمة
وأنت قلي يا مثالي
يأبن أصحاب السعادة والمعالي
قول لأصحاب التعاسة
ذكرياتك بالطفولة والدراسة
ذكرياتك ما تضحكنا وتحزننا كثير
كلها وحدك ولكنك بخير
وكلها مع الخدم
وفيك حزن وفيك هم
بس حزنك أنت ما حسيت فيه
في رفاهية ومتعود عليه
وجاي تتفشخر علينا
وأنت أحزن شخص فينا
يا مثالي