جوايا

جوايا

من يقدر يقتل

اللى راقد حزينْ؟

اللي ماكفَّ عن بكائه

طول عمرك ياسنين؟

فين ما أختفي

يمكن أغيب عن وعيىّ

أو في ضباب العيونْ

تفتحيلى الباب فى السر

ألقاكى معطره لى المكان

بريحة الجنونْ

أنا وأنت

كل مين فينا ملغى

ينتحب حوالينا النحيب

والسكك فى إيدِ صبيه

وآدي طريقك يادكر

وافتكر.. إما

أن تكون نبي زمانك

أو لا تكون.

مين ياترى

شعلل فيَّ النار

ولاففَّ كما الثعبانِ

حوالين رقبتى؟

ومين كسر بيباني

ورمى بجثتي

في وحل حالتى؟

مرةً، مرتين، تلاث مرات

ودمع ضلوعك كاتم الصرخات

وفى كل مرة تقول بعزم

هأصرخ في المرة الجاية

اللى ما فى مرة كلمتك صدقت

كفياك نعره كدابه

أزفت ياصاحبى ساعة الحسم.

كلَّ اللى تترجاه

تيجي لك الأرض

تاخدك على كفوف الراحه

باسطه إيدها ومطوعاك

تدوِّن فيكَ اعترافاتها

بخط إيديها

فتش جواك

عن معنى المحال

عن شكل الفكرة

وشكل الرؤى

بحلق فى كل العيونْ حواليك

ابني لك ممالك عظمى

ومارس فيها طقسك

الجنونى

شربت ظمأى من إيديكْ

وصوابعك رشقّت فى ضلوعى

طيرَّت برج العصافيرمن نفوخى

رحلتْ وأنا من ساعتها

هديت بنيات الحمام

وببنى فى غابتك عرين.