حييت يا من نظم الشعر حييت
من بو محمد لك سلام وتحيه
رسالتك وصلت وفالحال رديت
وأنا عرفت الباينه والخفيه
أصبر لجور الحب مادمت حبيت
وأش في يديه يوم تشكي عليه
أنا بعد من جور الأحباب عانيت
وأحس وسط القلب مليون كيه
ياما كتبت من القصايد وغنيت
للصاحب اللي مابعد شفت زيه
شيبت في حبه وأنا ماتهنيت
وأين العداله والقلوب النقيه
ماظني أسلى صاحبي لو تسليت
فالقلب حبه لين يوم المنيه
ماعاد ينفع قولنا لو وياليت
هات القلم والحبر وأكتب وصيه