ما همّني الكون خلّه يحترق بعدي
ملعون أبو الحزن والدمعة وآهاتي
تعبت أفكر بهذا العالم لوحدي
وأضيّع أيام عمري وأجمل أوقاتي
زاهد في الأحلام والمستقبل الوردي
يكفيني أعيش وأتمتع بلحظاتي
اللي عليهم بنيت آمالي وسعدي
هم كسروا لي مجاديفي وراياتي
أهدوني أشواكهم وأهديتهم وردي
واستكثروا في زحام الهم ضحكاتي
لو الشعر والقصايد عندهم تجدي
ما كان راحت خسارة أصدق أبياتي
ولو الوفا مثل بعض أوجاعنا يعدّي
ما كان زادت جروحي وانكساراتي
ويش الذي باقي من العمر لجل أهدي
للعالم أيامي وأجمل محطاتي
خلاص مليت من همّي ومن وجدي
أبرجع لعالمي وأهتم في ذاتي
وأعيش وأتمتع بهالعمر قبل أغدي..
أسير للحزن والدمعات وآهاتي