يا مجاريح الهوى وش طب من هو مبتلي
الهوى والحب جرحه ما يداويه الطبيب
وآآهني اللي فؤاده بالهوى دايم خلي
ما بلاه الله وراسه شاب من قبل المشيب
السبب فيما جرى أم الجديل الهلهلي
أسهر الليل أتعذب لأجلها وأنحب نحيب
حبها يجري بدمي في الحشا يغلي غلي
في عروقي نار تحرق تلهب بقلبي لهيب
والعواطف من غلاها تشتعل في داخلي
واحبس الأنفاس أداري دمعتي لا تستجيب
آآآه يا كل الغلا،، يا بعد خلاّني وهلي
عاذلي عن شوفتك بالناس مقطوع النصيب
يا بعدهم ما استمع للهرج أنا من عاذلي
فيك ما أطيع العواذل من بعيد ومن قريب
يا شبيه الريم،، فيني ما تخافين الولي
ارحمي من هو بحبك شايلٍ جرحٍ عطيب
كيف أبأنسى حبك اللي فوق راسي معتلي
وكيف أنا بأدله وزولك عن عيوني مايغيب
الذهب، والدر، والألماس مع كل الحلي
ما يساوي، وطيةٍ لأقدام، رجلين الحبيب