قم يا نديبي وارتحل شدْ مكلوف
يا زين طيحة جنبها لشدادي
سيلٍ يكلّي في مياريه وْيزوف
على كل عطشانٍ ومروي ونادي
والله إن كانك تبغي الصّدق موصوف
لا فكّ سيلٍ ما يجيبه يوادي
ومن عقب له قدّم تحياتي حْروف
أخن مْن العنبر وريح الزبادي
بلغّ سلامي سبع مرّات مرضوف
وخلّه على ذيك القبايل يْعادي
غير الاثّنين اللّى على قدم لكتوف
ياللّي على راس القدم له أورادي
حسبت له ستّه وستين مسفوف
سوادهن شروات حبر المدادي
والشعر هوب لْحد من حدّ معروف
هذا يسادي به وذا ما يسادي
في شفّ لى في حلقه العطر مديوف
بو خامصٍ مجلود غضّ الانهادي
بفزع بشبّانٍ أهل ضمنٍ وْشوف
لى ينتخونه بين زرق العوادي
إن كان مالك في هوى حّد مصروف
كاد ان أراجع صوبكم كاد كادي
قل له سعيد اللّي من الحب مضعوف
لا ينفعه شربٍ ولا طيب زادي
تعال إلى عدّال بيته ولا تطوف
حوّل بْزين وأوطّ عنْه اليوادي
نركب على الفطّر غليظات لخفوف
ونزور من حبّه قديمٍ وسادي
تثفر وبين أثفانها الذّيل مسقوف
ما يفصّ لو باتقبضه بالإيادي
في حزّ الضحى من يوم كلٍّ به وْقوف
من يوم يفدى العمر من دون فادي
واللّي يفكّر في معانيه ويشوف
بيفكّ بيبانه وبيطيح وادي