عِزِي لِمَن عينه جَفَت لذّة النوم
مِثلي يَرى بالنوم قَيْد الحديدي
ماني عشوق للمزايين محروم
همّي يطاردني وهمّي فريدي
عندي هواجيس بها الفكر مزحوم
دايم تطاردني ودايم تصيدي
والعقل تايه في شرابيك وحلوم
وحُلم يفارقني وحُلمٍ جديدي
والهم من راسي على القلب مركوم
أمواج قلبي بالمتاعب تزيدي
أشكي على الله ملتجى كل مظلوم
من واهجٍ بالصدر يوقد وقيدي
ضاقت بي الدنيا وأنا صرت مكتوم
ولا يناظر لي مخالٍ سديدي
عِزِي لِمَن شلّ الصبر دايم الدوم
بين الجوانح ما يدور عضيدي
أنظر إلى زهر الفلا نار وسموم
والنور حدّ يجزّ حبل الوريدي
وأنظر في الدنيا تماثيل ورسوم
دايم تواعدني وتخلف وعيدي