شف كلهم ودعوني.. ما بقى غيرك
محتاج اودعك.. ياليتك تودعني!
وجهك بقى لي، وحبي لك، وتأثيرك
وشلون ترحل ويبقى كل ما تعني؟
يلغي غيابك، ونسياني ، وتقصيرك
حضورك اللي بقى بعدك يلوعني
صحيح ماطالت اللحظة لتأخيرك
مثل امس..حين انتظاري فيك يجمعني
لكن فقدت الزمن بأسباب تخديرك
يا احلى وهم.. خلَّد احزاني وضيعني
تكفى تفضَّل..وخذ مني محاذيرك
حتى اقدر امشي بدربٍ عنه تمنعني
تكفى قِّل انه ما مَّر اسمي بتفكيرك
لعل قولك عن التذكار ينزعني
لولاك واحد..قدرت القاك في غيرك
لولا الرجاء فيك، عنك الياس يقنعني!