رسمتى بايدك طريق النهاية
بريشة قساوتك ف صفحة هوايا
محيتى نهارى بشكك وعندك
وجيتى ف منامى نهيتى الحكاية
وكم الف دمعة ف بحرك رسمتى
خطوطها بتعلى تغرق سفينتى
وموجه غريبه تكسر ضلوعى
نيابها الجوارح بتجرح كرامتى
وميت الف صخره رميتى فى طريقى
عشان لما ارجع تقطع عروقى
وفوق شط هجرك رميتى ودادى
بقسوة رفضتى غرامى وشوقى
وف مساحة سودة دفنتى فؤادى
وفوقها كتبتى دا كان يوم عشيقى
ياحلم الليالى لقيتك سراب
بتسرق ف عمرى ليالى الشباب
نجومك بتهلك قلوب الحيارى
وشمسك بتحدف عليا العذاب
ف قلبى رسمتك غرام للنهاية
وليه استبحتى دموعى ودمايا
احاول اغير خطوط الحقيقة
بكف القساوة كسرت الدوايه
اعاند واحلم اغير طريقك
تجينى ف منامى وتنهى الحكاية