آآه وآجض قلبي من صروف الدهر
جضّة اللي مريضٍ والمداوي كواه
هزّني صدمةٍ إرتج منها الصدر
ونشف ريقي ووقفت كلمتي في اللهاه
في نهار الأحد،، جاني شنيع الخبر
من غشيمٍ فجعني، ربنا ماهداه
قال ابن سعيد مات اليوم قبل الظهر
في طريقه قبل يبدأ وضوء الصلاة
قمت أطوّح بصوتٍ منه جاري حضر
ينشد أهلي محمد يالربع وش بلاه
ودمع عيني سبقني بالبكاء وإنتثر
غرّق الخد، وابتلت ثيابي معاه
مابكيت إعتراضٍ للقضاء والقدر
ماكتب تم، وكلٍ بيذوق الوفاة
الصبر ياجماعة وين أنا والصبر
ماقويت الصبر ياناس ويش السواة
كل حبٍ عفيفٍ صار بين البشر
لو يجيبون مثله، مايساوي غلاه
ومايجي عند حبه نقطةٍ في بحر
حب في الله صادق الله اللي عطاه