شاقني والشِعر من يحلى يشيجْ
كيف لي مثلي لهم في الشِعر ذوقْ
إنْ شِدوْت اشدو على المعنى الدّجيج
وان طربْت على لفظٍ يروق
ما نجامل بالحكي لي ما يليج
الصراحة: شيمة الحر الصدوق
يا بدر نَوّر على دنيا الخليج
لا عِدِمْنَا من محيّاك الشروق
يا دليلي في متاهات الطريج
إنتْ لي دايم على العليا سبوق
كم عرفنا مِنْك مِن مَعْنَىً غليج
وارتفعنا بك عن الهامات فوق
ما يخادِعنا عن النور الصليج
والندى مَ يْعيض عن وبلٍ دفوق
ما يضيج الفّي في عين الصديج
وانت سالم وين يِتْجَرّا يضوق
نحن من دنياك في روضٍ بهيج
بين غدرانٍ وغرّيدٍ يشوق
والنسيم يْزِف هفّات الأريج
في الصباح وفي الرواح وفي الغبوق