على الله كلّ كسرٍ في القلوب ولازمه تجبير
على الله كلّ ما يسلب ولد آدم من يدينه
تمنينا الجبر دايم ولا في شي على الله كبير
يقين المؤمن بربّه جرى داخل شرايينه
أنا عبدٍ ضعيف، وأنت قادر... ما تشاء يصير
طلبتك تحفظ لعبدك يقينه، وضحكته، ودينه
طلبتك تغفر الزلّات، وتتجاوز عن التقصير
طلبتك تصلح اللي جاي وتبدل شرّه بزينه
أنا في حاجتك ربّي، وعلى دربك أحثّ السير
معي قلبٍ عليه الدهر مشهر كلّ سكاكينه
معي قلبٍ عزيز ونفس والله ما شكت للغير
وراسٍ شامخٍ لكن لأجلك يخضع جبينه
أنا المحتاج لك وأنت الغنيّ وبيدّك التدبير
هذا قلبي على بابك... تبدَّل قسوته بلينه
أجيك وما معي حاجة سوى قلبٍ كقلب الطير
ضعيفْ بحاجتك وأنت الغني عمّا في يدينه