يالله طلبتك في صلاة الليل والثلث الاخير
انك تجمّلني وتقبل ركعةٍ صليتها
الروح باذنك يا عزيز الجاه فالدنيا تسير
بيديك تحييها وبيدك لن بغيت تميتها
ياللي تنشّدني وانا عندي عن النشدة كثير
لكنّ لا تكثر علي اللوم لن كنيتها
جربت فالدنيا وانا ماني كبير ولا صغير
واحرمت نفسي من هواها فالزمن واعطيتها
واخطيت والمخطي يصيب من الخطا لو يستشير
واذنبت وذنوبي ماني معذور وان سويتها
واخذت درس من الليال السود واليوم العسير
ان السوالف ما تفيدك في لعلّ وليتها
وان القريب اللي تود الْه المودة من ضمير
لو كان روحك في يَدَه ما مل من تفتيتها
وان الجميلة ما تجيك من الملقف والدشير
دام الجمايل ما ربت في بيت ماهو بيتها
والشلة اللي تمدح البترول وتذم الغدير
الله يصرف عنك ديزلها ويصرف زيتها
ماني وانا ابن سعيد لا هافي ولا نفاخ كير
لا صرت اخاف الله ولي عزوة يشرف صيتها
ربعي بني الحارث هل الفزعة ليا صاح النذير
واليا انبرت في حومة الفتنة طفت كبريتها
واليا دعتهم راية التوحيد في يوم النفير
ما يخلفون الوعد للراية ولا توقيتها
المنسب اللي ما طفى في برد والا في هجير
جمر العرب سمّى بها التاريخ ما سميتها
ان جيت ابخدمهم ولن روحت خلوني سفير
افخر بعز الحي للديرة واحن لميتها
واشوم عن سود الوجيه وشيمتي شيمة كبير
ما تقنعه خوة هلافيتٍ مطفّي ليتها
ناسٍ تعفرت وان لقت فتنة .. رحاها تسدير
وناسٍ رحاها تدرّج طيبة على عفريتها
وعفاك يا ناشد عن المكنون واسرار الضمير
بيت القصيد اليا خذيت من القصيدة بيتها
يالله وانا عبدك وبين يديك لا طال المسير
اغفر ذنوبي وادمح الزلات لا زليتها
ادعيك تهديني وترزقني من افضالك كثير
وانك تجمّلني وتقبل ركعةٍ صليتها