أنا الأديب... الأدباتى
ف الأكل تلقانى نباتى
على رأى الست مراتى
ياعينى عالوكسة الكُبرى
الله الله يابدوى جاب اليسرا
خاصمت لحم أو بروتين
الفول يخلِّى الجسم متين
وخلاَّ مخ ولادى... تخين
الله عليه... جوَّة القدرة
الله الله يابدوى جاب اليسرا
وعندى واد جِن صغيَّر
ساعات يقول بابا نغيَّر
طعام غير الفول.. أتحيَّر
أقوللو: فيه مفاجأة بكرة
الله الله يا بدوى جاب اليسرا
وبكرة لمَّا... بيجيلى
أجيبلُو كبدة... برازيلى
على الغدا الواد.. يدعيلى
ومراتى على سِنجة عشرة
الله الله يابدوى جاب اليسرا