من باب اسمع هرج يكفيك لأجيال
لو المعاني في حصيلي شحيحه
جيتك ب قافٍ مرتوي كله إجزال
عليه من وسمي خيَال القريحة
اشمخ لو إن الحمل من فوقك ادبال
اشمخ ولا لك بالنفوس القبيحة
عانق سما الفرقد على كل ما طال
يوم إن غيرك ثاويً في مطيحه
خلك مع اللي لا بغى يبني آمال
يرسم سماه وراحتينه فسيحه
أما يجيب العلم في صدق الأقوال
وإلا عسى المولى ب ضعفه يبيحه
ما همّه اللي يتبع علوم جهال
اللي هروجه ف الخنا مستبيحه
يا صاحبي دونك من الجال للجال
اضرب على اللي ينهجون الفضيحة
تلقى لك أشكالا على هيئة رجال
إذكور بالمعنى عباره صريحه
لو زودوا بصياحهم مثل الأطفال
بانت لك المتردية والنطيحة
القافلة تسري يسوقونها أبطال
واللي وراها تسمع أقصى نبيحه
حِسد البشر موجود باقي ولازال
مذكور في مسلم ومجمع صحيحة