طلع النهار من تاني من بعد ليل طويل
أحلام كتير متقطعة مليانة بالتفاصيل
هي كده ليالي الصيف المرهقة وصباحاته
تفتح عيونك بدري للشمس والمواويل
وعند الخط الفاصل بين دخول الليل ورحيل النهار
أشباح مشاعر لونها باهت خلوا قلبي احتار
أفكار كتير متفرقة متبعترة منسية أو مركونة
لملمتهم من تاني جوه خزنة في خزاين الأسرار
فتحت عيني تاني لعالم المجانين
لإمتى هقبل أفضل دايماً تعيس وحزين؟
ده الحزن ساكن فيا من قبل هذا اليوم
لكن لو سبته وارحل ههرب واروح على فين؟
وعند سور السعادة وقفت اشب لفوق
شايف مواكب غلابة فيها الفرح مسروق
هجم عليا الحزن خلاني تاني نزلت
وقال سايبني لوحدي قاعد أنا مخنوق
صحيت الفجر بدري قبل كل الخلايق
عقلي صافي وفهمني كل الحقايق
عن الدنيا والتاريخ والزمن والحكمة
غمزلي قلبي وقالي هفضل أنا سايق
بندور يا حبيبتي انا وانتي في دواير انتظار
وف كل لحظة ما بينا يتحط ألف جدار
هدمت سور ورا سور وجيت كما الفرسان
لقيتك واقفه تروي جناين الصبار
أخر ساعات الليل شايف سحب وغيوم
ونجمة تايهة بعيد باين عليها وجوم
كل الحاجات حواليا نايمة إلا انا سهران
مش عمق مني ده انا بحلم بشط واعوم
اخر ساعات النهار وف صمتي أنا غرقت
لإمتى هفضل كده للوحدة انا عشقت
لازم أثور أنا واصرخ واقول كل اللي فيا
وقمت اكسر صمتي لكن لقيتني سكت
رباعية كلها أشجان وقت العصاري كتبت
ع الوحدة والأحزان وبواقي احساس كبت
خبطني عقلي وقالي أسكت بقى يا جدع
روحت ماسك قلمي وعليها انا شخبطت
في ليلة قولت أه ووراها أه واتنين
ولا عمري بان لي وجع ولا كان لى حتى أنين
قالولي ماله الجدع عترة ويملى العين
أنا قولت لو تعرفوا قلبي ما بين جبلين
وقبل دروب الألم لفيت انا من بعيد
ومشيت لسكة غريبة أخرها حلم جديد
طرق حواري شوارع وناس ما تشبه بعضها
أجمل ما فيها لقيتني مبقتش فيها وحيد
طلع الصباح من تاني وجايب معاه الشمس
أنا روحي لسه عايشة ف حلم ليلة أمس
غمضت عيني تاني وأخدت الطريق للحلم
لقيتني خدت مخالفة لأني راجع عكس
وروحت سوق السعادة فجأه بدون تمهيد
لقيت أمم واقفين طوابير ولا التجنيد
وقفت أنا وياهم من غير ما أسأل ليه؟
ساعتين قالولي مفيش روح اسأل في البريد
حلمت بأرض السعادة اللي اتكتب فيها مواويل
حلم ليلة صيف مبهج غريب وطويل
فتحت اللوكيشين وعرفت الطريق لهناك
وصحيت أجري عليها بسرعة بدون تأجيل
رواية عن الحب والعشق وأيام الزمن القديم
قررت أكتب عنها بشغف وببساطة بدون تفخيم
سطرين كتبت ورميت القلم بعيد وزهقت
وعملت الورق مروحة جايبالي هوا م الجحيم
خمسين كتاب مخطط أقراهم أنا بكل حماس
سلاسل أفلام دراما على رعب وحب وإحساس
كورسات كتير متنوعة شايلهم جوه فولدر خاص
هزيت دماغي وقفلت عليهم بمية ترباس
وبحب أنا صوت الصبح لما الشمس بتيجي بهدوء
وبحب البسمة الصافية لما تخلي القلب يروق
وبحب الورد واحب النور وأماني بدون تخاريف
وبحب أنا عمرو الصبح لما يغنى أغاني الصيف
وفي وسط ساحة الألم لمحت ضحكة عيون
بسعادة قلبي ابتسم وبيها بقى مفتون
أما صحيح مجنون ده انت في قلب الوجع
بضحكة حلوة جميلة تنسى كل الشجون؟
رباعية لچاهين جت في بالي في لحظة غريبة
عن الاختيار الحتمي في أوقات القلق والريبة
كنت فاكرها زمان عن المواقف في قلب الشدايد
لقيتها عن العشق والبعد واختيار الحبيبة
ساكت في زحام اليوم العادي وف زحمة عقلي بحس جنون
مجنون أنا ولا أنا عاقل بيداري أحلامه عن كل الكون
أنا عايز حد يبدد شكي ويحكي معايا طول اليوم
بس أنا خايف يدخل عقلي وف أخر اليوم يرجع مجنون
والليلة حلمت بحلم قديم عن معنى اختفى من قلبي وراح
وف صمت منامي لقيته الليلة واقف يرقص في قاعة أفراح
رقصت معاه ساعتين وتلاتة لحد ما ليلي بقى اسمه الأمس
فتحت عيوني نسيت المعنى وبشرب قهوة أنا ويا الشمس
وباغتت الحلم بلا استئذان وقفلت عليه كل الطرقات
اتخض الحلم ثواني قليلة وبرقة ضحكلي بكل ثبات
وقعدت أنا جنب الحلم أغني أغاني رومانسي بنغمة لذيذة
سهاني الحلم وقام كده يجري ويقول للناس سفاح الجيزة
عالخط أنا ماشي بكل جراءة وفي أخر اليوم يتمسح الخط
وأرجع من تاني بكل براءة وكأني غريق على نفس الشط
وف نفس سريري برتب بكرة وأحط خطط جبارة رهيبة
واحلم أحلام فانتازيا غريبة عن ملك الغابة ف مسيرة بط
والليلة حلمت بماضي قديم على غير العادة لقيته بيعود
وأخدت بأيده رجعنا زمان لقينا مكانا ما زال موجود
وفوسط الحلم لقيتني بخاف وطريقنا مالوش لنهايته حدود
بصيت جنبي لقيته بيهرب لشارع ضلمة وطريق مسدود
عصفور وحيد على حد السور بيغني للنور والنهار
لمح أسراب جراد غطت شعاع الشمس ولا جيش تتار
واقف كما فارس محارب صامد ف وش الضلام والشر
لا يهمه خوف أو موت بيغني موال الصباح كما الثوار