جتني تهادى غيمةٍ مستقلّة
هتانها يعطر انفاس الاصباح
تهمي على قاع الفؤاد وتبلّه
تكبح لهيب الشوق والشوق فضاح
تقول ممكن توصف الحسن بالله
قول الصراحة شفت في حسني ملاح؟
قلت انتي اخذتي حلا الشرق كلّه
عندك على خزاين الزين مفتاح
انتي طلعتي للقمر في محلّه
والاّ القمر في وجهك من السما طاح
ليلك على باهي نهارك تهلّه
يامجمّع الأضداد ياعنبرٍ فاح
الوجه نور الصبح والخشم سلّه
والشعر داجي ليل والخد تفاح
والثغر نبع العد والهرج فلّة
وحواجبٍ مقرونة ورمش ذباح
والعنق عنق الريم دقّه وجلّه
ونحر بحر مايعبره كل ملاح
ضحكتك حفلة بالفرح مستهلّة
انوارها مليون شمعة ومصباح
وباقي وصوفك باهياتٍ مطلّة
تسبي عقول وتسرق قلوب وارواح
ياخف دم الزين ياخف ظلّه
كساه ربّه بالحلا تاج ووشاح
لويخطف الأحداق محدٍ يملّه
يستعمر الخافق بلا حرب وسلاح
ان مربي عطره وورده وفلّه
يطيرله قلبي بلا ريش وجناح
مفتون في دنيا دلاله ودلّه
ايام وصله مهرجانات وافراح
راهن على روض الحشا لين حلّه
باح الحمى اللي كنت حاميه ماباح
شربت من صافي تجافيه دلّه
ومن التجافي كم تجرّعت الاقداح
عاصف هواه يتل قلبي يتلّه
الشوق له موجود ماراح ماراح