وردت نبع الأمنيات وجف من قدام اجيه
حتى الأماني ما بقي لي في منابعها نصيب
والصاحب اللي كنت متمني لقاه ومرتجيه
خيب ظنوني فيه وأنا أحسبت ظني ما يخيب
إن جيت بشكي ما يطاوعني ضميري واشتكيه
واشكي لمن والقلب عيّا لا يطيع ولا يجيب
احترت انا من بعد صده بين أبيه وما أبيه
من بعد سبب لي جروحٍ ما يداويها الطبيب
اشتاق له واحنّ له وافزّ له واشفق عليه
والشوق جامح في خفوقي له وترويضه صعيب
عقلي يقل يا قلب من باعك خساره تشتريه
ويجاوبه قلبي بونّاتٍ يرافقها نحيب
اخلف مواثيقه وكابر بالجفا واحترت فيه
وانكر غرامي لين صرت بدنيته شخصٍ غريب
ضاع الوفا من قلبه اللي كان قلبي محتويه
قلبٍ وهبته له فدا ولا لغيره به نصيب
الاحترام اسما معاني الحب في القلب النزيه
والاهتمام أقوى الروابط بين محبوب وحبيب
إن كان ناوي للفراق وصار قلبه مرتضيه
مع السلامة واقبل المقسوم بالصدر الرحيب