لي صاحب(ن) يوم هو وافي وفيت
ولا طرى لي بديل بْصحبته
اقرأ كتابات شعره بيت بيت
واشوف انا عزتي من عزته
يأمر وأطيعه وعمري ما عصيت
كني مسخر مقيم لطاعته
وان قال تكفى أقول ابشر وَزَيت
ابشر بعزك والبِّي حاجته
واليوم كني مثقل في المبيت
واكلي وشربي معه من غلّته
لاني بْمخطي ولا ادري وش جنيت
مدري وش اللي مغيّر نظرته
يا صاحبي والله اني ماهقيت
حبل الصداقة من ايدك تفلته
أحسبك لي عزوتي لا ما اعتزيت
لا عارضتني ظروف اْمباغته
ما ضرني لو لشعري ما قريت
مانْته عن الناس مخفي شهرته
اجتزت حد المجرة واعتليت
كل(ن) شهدلي بوافي ذمته
من كل راقي جلبته وارتقيت
فنّ بْسما الشعر تبرق نجمته
اغرف من البحر لا منّي نويت
واروي العطاشا بوابلْ مزنته
وانحت من الصخر ما عمري شكيت
ويْلين صلب الصخَر يوم انحته
للشعر أنا من صغُرْ سني هويت
وابوي يهوى الشعر من صَغرَته
خيال فارس ليا مني امتطيت
صهوة جواد الشعر ياصهلته
ما اعجز عن القافية لا من بنيت
بيت القصيدة يقرّ بوزنته
روعة فنون الشعر منها جنيت
نظم(ن)تحار العقول برقته
لو جيت ترقى سما شعري هويت
تعجز وترجع تعود لتربته
وش جاك يا صاحبي يوم انطويت
عن صاحب(ن) ما جفاك برفقته
صديت من غير علة وانزويت
وأظن سمحان بانت علته
كانك لصفحة صداقتنا طويت
صاحبْك وش في يده وش حيلته
إن كنت يا ذيب من جوعك عويت
النمر... مابات طاوي ليلته
آنا مع الناس وافي ما حييت
والحر ماهو مغير فطرته