آه من طعم الغياب المر يوم آذوقه
أحترق في داخلي والعن غياب احبابي
وآآه من ثقل السهر واللحظة المخنوقة
في خفايا دمعتي وغيابها وغيابي!
وآآآه من فرحة زمانٍ سارقة مسروقة!
علمتني كيف اعيش الحلم خلف ابوابي
وآآآآه من حزنٍ على عمري تميل عذوقه
شايله لا ينكشف لمرايتي واصحابي!
تركض الدنيا وبعضي ما قدرت اسوقه
والضياع يحدني منّا ... ومنّا مايلات اطنابي
ياحبيبة قلبي استسمح هواك وشوقه
شفت ضعفي ف اصبعي من قو عضة نابي!
سامحيني لو يموت الصبح قبل شروقه
لا انولد ليل الجروح الساكنة ف اهدابي
سامحي قلبٍ يشوف الحب وسط عروقه
يوم غنيت الوجع واثر الوجع غنى بي:
آه من طعم الغياب المر يوم آذوقه
من عذابي يوم قمت العن غياب احبابي