صباح العيد والحزن القديم وذكريات البين
صباحٍ فيه صوتك مرني روحه وريحانه
صباحٍ من ثلاث ايام مرّت بي إلى هالحين
وانا ابكي ضيقته واشره على ظلمه وعدوانه
صباحٍ ما رحمني من سواده وارتباكه لين
طعونه واجتياحه للحنين وظلم ميزانه
تركتيني وانا مرمي على شطٍ من التخمين
أصارع وحدتي واركض ورا حلمي وعنوانه
تركتيني معلّق في جروحي وانتظرك تجين
تفكين القيود وتطلبين القلب سلوانه
أنا محتاج لك .. محتاج لك .. محتاج لك تكفين
أبيك تكفنين القلب لا من مات باحزانه
خذي مني حنيني أو خذيها عيوني الثنتين
خذي مني حياتي لو حياتي مالها خانه
انا اوعدك اني ابقى وين ما رحتي بدون يدين!
ولا احضن غير صدرك والغرام ان فل جنحانه
أحبك لعنبو قل الوصال وطعنة السكين
إذا كانت من يديني ف صدرٍ فاض تحنانه
أنا وشلون اعيّد وانتي اعيادٍ بطعم البين
بعد ما مرني صوتك بلا روحه وريحانه