السهر يا بنت عم الشمس واخت القمرا
سكةٍ ما شفت فيها غير كثر اللوعة
والليالي مالها الا كلمتين ومسرى
ننتهي فيها جراح ونبتديها روعة
صدقيني ما كتبت الا بقلبٍ يقرا
ضيقة اخلاقي وتنهيدٍ ضويت شموعه
يوم شفت الشوق في كل العروق استشرى
قلت احبك يا الثقيلة – عفواً – الدلوعة
أذكر انك كنتي اعرف في ظروفي وادرى
لا طلبت وشفت رغباتي معك ممنوعة
عاشقك لا شد حيله في وصالك وازرى
وش يسوي دامك اول من يصد جموعه
النهر لو كان ماله ضفتين ومجرى
جفت ايامه وشحت لا تمد فروعه
في غيابك ضيقة ايامي تجيني تترى
ضيقةٍ لا منها جتني تجي متبوعة
بالتعب والحزن والهم وهلمّ جرا
وونةٍ تسمع وونة ماهي ب مسموعة
هذي اخرة الهوى يابنت عم القمرا
سكةٍ فيها سعادة بس الاكثر .. لوعة!