لو فيه عدالة.. وكنتِ ناوية تنصفي.
ينفع كدا؟!
الشمس بعدك لملمت نورها وناوية تنطفي
والبرد حالف ينتقم
ويجمّد القلب اللي في حضنك دفي
والليل بقى نمرود، وفارد وحشته.
وبسحنته السودا حابسنا جوه قمقم خوف عفي
وانت بعيييييد.. لا بترحمي..
ولا ناوية مرة.. تفهمي.. أو.. تعطفي
ليه كل دا؟!
قاضي المحاكم مهما كان عادل.. غشيم
وقانونه لا يعرف غرام.. ولا شوق.. ولا اللهو الخفي.
فبلاش بقى تتفلسفي
والحبة تبقى قبتين
وتزوّري تاريخ هوانا اللي انكتب فوق الجبين
قبل السنين ما تكون سنين.
وتلخبطي.. وتزيّفي
وتضيعي تاني في دنيتِك
ويتوهِك وهمِك
وتمشي تخرفي
وتجيني تاني..
تحلفي.. وتتأسفي.
كان مالنا بس؟.. ومال هوانا بكل دا؟؟
عاجبك كدااا؟؟!!!