كانو جنبي
ضحكهم من جوا قلبي
كان غُناهم مالي دربي
كانو جنبي
عزوتي وناسي وصحابي
فرحهم يرقص ف جنبي
حزنهم حزني ومُصابي
صاحبي جرجس كان كتابي
صاحبي أحمد كان بيقرا ف مصحفي وحامل كتابي
كان جرابي
كل أسراري ف بيره
فرحتي.. همي.. عذابي
كان ف دنيايا الونيس
كان عريس
دخلته الشهر اللي جاي ده يوم خميس
يا زمن قاسي وضبابي
كل شئ ف الدنيا يغلا بالحساب والحساب تاجر مُرابي
إلا إحنا
دمّنا بيرخص وروحنا
وتبقا محنة
لو ح نفضل عميانين للزيف نطبل أو نحابي
كانو جنبي
تاهوا مني
حد شافهم؟
حد في الأشلاء عرفهم؟!
يا بلد بتبيع تذاكر الموت لناسها
وتنسى من باسها وكان خده مداسها
وتفتكر من باعها ونساها وداسها
انتي مين؟!
رايحة فين؟!
فاكره يامه يوم سألتك
ليه بتدعي عليا قلتي:
أيوه بدعي من ورا قلبي يا قلبي بس من غيظي وغُلبي
لكن أكره أي حد يقول آمين
أيوه بلعن كل زيف فيكي يا بلدي
ويمكن أدعي بس بردو قلبي يكره
أى حد يقول آمين