لو قلت انا طيب فلاني بمرتاح
الجسم طيب والهموم أنهكتني..
والطبع ماهو مثل ما كنت مزاح
شوفوا.. تجاريب الزمن ثقلتني..
صحيح لي فيها مماليك وأرباح
لكن.. بعد ما ربْحت خسرتني..
اجامل العربان والسر ما باح
صامت ولو أن الحياة أتعبتني..
والحزه اللي للصقاقير ملواح
من راح طيري لا لفت كدرتني..
أول ألاقي به لهالضيق مفقاح
واليوم لا منها غزت قيدتني..
مدري ألاقيها من الناس يا صاح
ولا بوزارة تربيه غربتني..
الناس تحكمنا مثل حكم سفاح
وتحكم على ما تشتهي معرفتني.!
لو طحت مره قالو فلان ذا طاح
الله يستر والبشر فضحتني.!
ولو تشتهي مدحي غدا الكل مداح
وأقوالهم في عينهم كبرتني..
والماء لو مابه بعض نسبة أملاح
ما صحّت أعضائي ولا شبعتني..
والديك ما غير لصلاتين صياح
وتسميته المذن عليه أضحكتني..
يا ليت كل إنسان فاهم ولماح
كان الحياه بقربهم ريحتني..
والمشكلة حتى من لقلبي اجتاح
ماهي مثل اول ولاهي تركتني..
من عقب ما همي إذا جت ينزاح
ومن عقب ما في قربها ساندتني..
ومن عقب ما عود المحبة لها فاح
ما كنها إلا بالغلا علقتني..
والوضع متدهور ويبغيله إصلاح
والأسئلة في داخلي حيرتني..
ليه الأمان اللي أحسه معك راح.؟
وليه الحياة الحين معك أهلكتني.؟!
أبي تجاوبني على شان أرتاح:
ويين الصفات اللي بحبك رمتني؟؟