الشعر فكره يا راعي الشعر والفكرة
يالشاعر اللي مع الشعار عملاقي
سوق المعاني تملكته ومحتكره
بالفعل ماهي شهايد بيض الأوراقي
أوّله ما جيب قبلك وانت مبتكره
وأشوف كنك على تاليه توّاقي
يا عاشق الطير حب الطير من ذكره
لاصار كفه شطير وريشه دقاقي
ماكره في نجد ما مارابه الهكره
ولا شراه الردّي وباعه عراقي
على غزال الشداد اللي على البكرة
أورّد نياقهم واصدّر نياقي
احب راس الظفر وآطى على العكرة
والأمة أخلاق وأنا هذي أخلاقي
للوقت وقفه حساب وللزمن نكره
والله يصبر من أفارق على فراقي