يا رشة القلب بالحنة
ومتعطر بمية حب
يا ساكنة النبض من جوه
وراكنة في صميم القلب
لمحت الحب علي إيدك
قمر سهران بيتهني
لمحت الكحل في عنيكي
حرس علي رمشك إستنى
يا ست الحسن في جمالك
حوريه ونزله م الجنه
ومسك العود بيتجلى
ومن حسنك بيتملى
يا رشة القلب بالحنة
يا شاغلة القلب والخلخال
علي كعبك بيتحنى
وعاملة من لنجوم عناقيد
وعلى صدرك بتدلى
يا دقة ع الوتر قلبي
بغير قلبك ما يتمنى
وغير طلت عنيكي ماأشوف
ولو عمرين أنا استنى
يا غنوة وشاردة في الشريان
بكل الفرحة تتغنى
يا حلم العمر
كان تايه زماني معاه
ولما لقيته عشت معاه
كأني عايشه في الجنه