ياأم الضى الممهور غالى
يا كل خيوط الشمس
تعالى
طُلى علينا
بلاش تتعالى
ولا تحالف تم مابينك والخفافيش
دأنتى أملنا
وكل أملنا.. فى ضى نعيش
متستنيش
دأحنا يوماتى بنحلم بيكى
ليه تتخلى عن دورانك؟
هُمَا البُعَدَا ضغطوا عليكى
تنسى ولائك
تنسى مكانك؟!
حتى القمرة
لينا زمان وما شفنا القمره
حبل الود ما بينا وغايب
إحنا وعارفين
إيه فاتورتنا..
طاطينا
وسيبنا فسادهم
راكب
طيب.. وإنتى
غَيَر إيه ياحبيبتى أحوالك؟!
عاد التانيه
قلبت حالك؟
مالها ومالك؟
دا المتغطى
بيهم هالك
ربى عيالك
حالهم بات يصعب ع الكافر
يوماتى
فى صد لريح بتعافر
عينى عليهم
حَبة ضَى
جِوَه الخيه
مش فاهمين
مين الميت
واللى ما بينهم
مين الحى؟!
حَبة ضَى