حبيبتى غريمتي
وصدقى دا خيبة
فى قربك جريح
فى بُعدك شتات
بجد.. بجد
ظروفك عجيبة!
يا أبويا سامحني
لا أنا قدرت أوفي
بوعدى لحلمك
ولا قدرت أحافظ
عليها فى قربي
ياأبويا سامحني
شايفها بتنقل عطاها
لغريمي
غريمي وعدوىِ
وللي بيسبغ عليها الأماني
الأماني.. بتدِىِ
فاتتني حبيبتي
فاتتني ولايف عليها عِداتي
فاتتني لحيرتي
فاتتني مكاني
وأنا جوه توهتي
فاتتني لخيبتي
حبيبتي بأقولك
فى حضنك خُديني
تقولى عينيا
وتنسي تراعيني
أجيلك تصُدي
طريقي بجدار
تشيلي جدارهم
وأنا ما تشيليني!
أجيلك وأمرمغ
كياني ف ترابك
وأعاتب فى أبويا
لضعفُه أما سابك
أتاري القضية
مهيش بس فيهم..
عداكي اللى سرقوا
شبابي وشبابك
دأصل البلاوي..
فى أخويا أبن أمي!
وضهري من أبويا!
حبيبتي غريمتي
وصدقي.. دا خيبة
فى قربك جريح
فى بُعدك شتات
بجد.. بجد
ظروفك عجيبه