ألف أولف من كلام نظيفي

ألفٍ أولف من كلامٍ نظيفي

ودموع عيني فوق خدي ذريفي

ما ألام في حب الحبيّب الوليفي

دقاق رمش العين سيد الخوندات

خوندات ياللي مابعد عاشرّنه

قل له تراهن في الهوى يذبحنه

قلبي وقلبك من عروقه خذنه

عزي لمن مثلي تعرض للآفات

الباء بليت بحب خلي على ماش

ولاحصل لي منه ما يبرد الجاش

غديت أنا وياه طاسه ومنقاش

بالوصف كني يالمعزي سلامات

سلامات للذي هم، يذكرونه

يبي السلامة منه، وهي المعونة

يقول طيّب مير غارت عيونه

سبب ولدكم واحدٍ صابه ومات

التاء تليت الزين والزين مقفي

أمشي وحتفي ناقله فوق كتفي

لاشفت مجدولٍ وكتفٍ وردفي

ما أقوى التفت لوّ طوحو لي بالأصوات

أصوات وإن قالوا سفيهٍ وسايح

طرد المقفّي يالمشقى فضايح

قلت أيه مير أشواركم والنصايح

مثل المطر فوق السحال المكفات

الثاء ثمانه حب رمّان طايف

أوّ قحويان في رياضٍ عطايف

متنفلٍ بالزين سيد العفايف

عمهوجة فيها من الحور شارات

شارات فيها من ظبيّ الحمادي

هيّ لذة الدنيا وغاية مرادي

من يوم قفا صويحبي من بلادي

عليه جاوبت الحمامة بالأصوات

الجيم جاني من عشيري كلامي

ولا لفينا من يرد السلامي

عليه زرع القلب هايف وضامي

مالي جدا كود البكاء والتنهات

أنهت على ما فاتني في زماني

يوم الحبيّب زارني في مكاني

وراي ماخذت القضاء يوم جاني

توي دريت البيض فيهّن غرات

الحاء حليّه في الوطن ما لقيته

عذلت نفسي عنه ولا قويته

وهو لو يذكر يم مسكة صيته

أنصاه لو دونه بحور ومسافات

مسافات لو هي في بحور الظلامي

أو وسط بتّيل حداه الولامي

وإذا حصل شفّ وبلوغ المرامي

صبرت لو طبّيت بحر الظلامات

الخاء خليلي صار عندي قريبي

جعلي نصيبٍ له وهو من نصيبي

ودي نواجه، نور عيني حبيبي

مار الوحيد لهيد، ما فيه نوهات

نوهات نوهاتٍ غدت من غثا البال

طول النهار امسيم عمّال بطّال

وأنا أترجى كل حولٍ الى حال

دنياك هذي يا اريش العين نشبات

الدال دامي، ما مسكت الذوايب

لوّ قيل طيّب قلت ماني بطايب

دنّوا استاد القبر.. أدنوا النصايب

ودنوّا دواة الحبر نكتب سجلات

سجلات أريد أكتب بها ليّ وصيّه

عمري غدا يا وجد أهيلي عليّه

قولوا لصاف الزين ياقف عليّه

أغديه يرجع وايتحسّف بما فات

الذال ذالي، عنه مدة ليالي

لو قيل طيب قلت أنا أبخص بحالي

والله مايطري على شف بالي

إلا أنت يا راعي الثمان الرهيفات

رهيفات فيها للمشقىّ، طرابه

مجمول مدلولٍ، ولابه طنابه

هني من يدخل معه في ثيابه

وأسج أنا وياه في العمر سجات

الراء ردوف صويحبي، ثقلّنه

ونهود للثوب الحمر، شلّعنه

ومثومن ما احلى بياضه ودنّه

من فوق جسم فيه من عرق الأرطات

أرطات غرمول ذرته الذواري

والله لولاني على الترف أداري

لأضوي عليها مثل ذيب الغداري

جايع وبالغابة عياله مجيعات

الزاء زماني شفت منه الهوايل

لاعاد حظي بالغنادير مايل

الزين لوّ نترك قصيرٍ وطايل

لاشك وين العقل هيهات هيهات

هيهات،، لوفي العقل يا ديب لبّه

ما كان، يتبع واحدٍ ما يحبّه

ليصار قولي له، خريطٍ بدبه

وش لك بشوفه يالعيون المشقات

السين سقنا من الدراهم وعيّا

واللي نبي من صاحبي ماتهيّا

يقول والله، لوّ تحب الثريا

خذني على السنة تشوف الطرابات

طرابات ينسّنك جميع الدروبي

أغديك، في باقي حياتك تتوبي

وأودع مقرك بين جلدي وثوبي

وتشوف فرق البيض فيهّن لذات

الشين شاب الراس يا عذب الأنياب

واللي بطاري توبةٍ كان قد تاب

لي حاجةٍ يا زين، بس افتح الباب

يرحمني اللي، عالمٍ بالخفيات

يرحمني إني فيك يا زين مفتون

من حبك أسهر والخلايق ينامون

ألهيتني، عن مذهب اللي يصلون

ما عاد أميّز، لو قران التحيات

الصاد صيدي يوم ألاوي غريمي

شفق على الحِبة ولمس البريمي

ماهوب صيدي قلّةٍ في الحريمي

لا شك كلٍ له مع الناس مشهات

مشهاتي أنته، يا ظبيّ الفريدي

حب العرب ينقص وحبك يزيدي

لاشفت زولك ذاك هو يوم عيدي

تصبح بساتين الضماير مريفات

الضاد ضدٍ، حال، بيني وبينه

يقول هذا، ضايعٍ، لا تبينه

جعل الوجع يشقيه بصبيّ عينه

يسهر ولا يمرح من الليل ساعات

ساعات جعله، ما يشوف الجدارا

ولا يعرف الليل، هوّ والنهارا

عساه يوم البعث يحشر حمارا

ويحمّلونه حمل الإسراف سيّات

الطاء طويت الياس والسدّ باحي

ومعادلي شف بظبيّ الضواحي

ياعلّها هفّت، خفوق الجناحي

اللي سبوقه، فوق رجله مطوّات

مطوّات وطار، في، يوم هبّه

راعيه، لو رز اللّوى ما ينبّه

طيرٍ قضيب أو الحباري غدت به

يبي العشاء من بين فخذ وثندات

الظاء ظمانه لا تعاشر لك أثنين

لازم تخلي عشرتك يا مسيكين

ماخبر يجمع في المرابط حصانين

يجي لها هز ودز وصقلات

صقلات يصقلها إلى أدنوّا طعامه

يجي لها، مع المعيشة بحامه

افهم كلامي يالهبيل الفدامه

إلى جمعت الحصن فالحصن خطرات

العين عمّن ينقل الهرج حذراك

تراك، كنّك ناقلٍ داك، برداك

والى سمع له هرجةٍ، من حكاياك

يحّطها كبر، القصور المبنات

مبنّات مبنات كبر خشم الغرابة

ويكدر المشروب عقب الطرابة

وهو يشابه، بومةٍ، في خرابه

لا ناقل الهرجه ولا كفو هرجات

الغين غاب العقل بأول شبابي

وأدميت من تلعات الأرقاب نابي

واليوم شاب الراس والكيف طابي

ماني على الفايت كثير الحسوفات

حسوفات لا تحزن على اللي مضى منك

أيضا ولا تفرح على اللي يجي منك

مادراك وش موجب سبب صدته عنك

ناهيك واليّ العرش رب السماوات

الفاء فؤادك، لا توليه حسّاد

واحذر يجي لك مع هل الشر مقعاد

اهرج وكنك عن جميع العرب صاد

ثم اعتبر بالذيب يضوي بغرّات

يضوي بغرّات وهم ما دروا به

واللي يوقف في المحاري هقوا به

كم واحدٍ وقّف، ولا قضي نوبه

يكسر، إلى شاف اللحم كنه حدات

القاف قل للي يريد، النواميس

اللي يبي طرق الهوى يرخي الكيس

وإلى بذلت النفس والكيس وإبليس

يطيح ناس، يدّعون الديانات

طاحوا وصاروا للخلايق علاجه

يلقى بهم راعي الهوى قضي حاجه

وإلى نثرت الحب جتك الدجاجة

حاضت وباضت لو تبي عشر بيضات

الكاف كنْ السّد، في كل الأحوال

واحفظ لسانك، لا يقولون ذا قال

حتى تجي عند العرب خوش رجال

لاجيت مجلسهم نواظرك صقرات

صقرات لاتجلس من اللي يشاكيك

هو داء دواك وتحسب إنه يداويك

يا ديب كان الله على الرشد هاديك

اكتم كلامك بالضلوع المحنات

اللام ليت العمر، ينكس لحلّه

قيمة ثلاثين السنة، هي محله

الرجل قبل الشيب، يا حلو دله

ولا لاح فيه الشيب ما فيه لذات

ما فيه لذاتٍ، ولا، يرغبونه

لو حط له ردن،، وكحّل عيونه

أهل الهوى عقب الغلا ينكرونه

لو هو مصافيهم على فايتٍ فات

الميم ما غيري من الناس جرّب

ولاهو بمثلي في حياته تطرّب

لاويت صافي اللون فوق المضّرب

كن العدوعني عيونه مداوات

مداوات جعله مايجي لك عبارة

واللي بصد عنك وش لك بكاره

الحذر، ما ياطا بوسط الخباره

لازم يجي فيها، عقارب وحيّات

النون نام الحظ، ولا فيه حيله

عيّا يباريني، وأنا أزريت أشيله

من يوم فارقني عريض الجديلة

قامت ايتكسّر في حشا الصدر عبرات

عبرات ضيقنا، حنايا ضلوعي

عليك يا خلي، حسين الطبوعي

والله ما جفّت، محاجر دموعي

دايم عيوني في مهاواك سهرات

الهاء هواي السابعة يا الفطيني

والثامنة، ياللي تعرف الرطيني

مخفيه، ماودي، لضدي يبيني

والتاسعة تحصاه بأعداد الأميات

أميات مات القلب من كثرهمي

وأشكي عليك الحال ياولد عمي

أنته عضيدي وأنت لحمي ودمي

ترضاه يجفاني ولاني بمجفات

الواو ويل أهل الهوى من هواهم

كان الذي قد سم حالي وطاهم

كم ليلةٍ، يصبح، غبيبٍ عشاهم

إلاّ لقيماتٍ،، مع الحلق مرات

مرّات لين أقضي من الترف شفّي

وأوسده عضدي وزندي وكفّي

وأكشف عن اللي بيّن وامتخفّي

ثم يجي للزاد، والشرب لذات

لملف حبه صلف ومراقده كلف

لوهو يتمم مطلبي كان أقول ألف

حيثه صديق من قديم على عرف

وإلاّ فغيره لو يبي عشر بيزات

بيزات، ما أفلّها لغيره، بلاشي

من جنس رأس الظبي مابي عراشي

إلاّ، لمن مايه، على ماه ماشي

هذاك، من يمّه، فلوسي رخيّات