أبويا مات

أبويا مات!!..

من صُمود الشك دبلانة الحقايق

وإعتراف الصورة مش سِيِد الأدلة

كلنا باينين كأن القلب رايق

بس نِخلاَ بنفسنا نصبح أذلة

كلنا ف الُمر لولا الصبر عايق

كان زمان الموت

بيحصد ناس ما خلّا

أبويا مات!!..

كل العيال ف شارعنا ليهُم أَبّهات

إشمعنى انا اللى أبويا مات؟!!

سؤال..

ماكانتش بتجاوب عليه

مع إنها..

كانت بتتكلم لغات!!..

كانت بتمسح دمعتى

وتدارى ف دمُوعها بسُكات

بياخُدها منى شويتين

وساعات بتضعف بالساعات

وتضُم راسى ف حِجِرها

أسُكت بقىَ..

وإيديها تنزل طبطبة

رغم الشقا..

رغم إنخراطها ف العياط!!..

أمى اللى ياما إتكحلت

بالدمع عينها

كانت بتتفرفط آيات الصبر منها

شالت كمان فوق حِملها

أربع يتامىَ الله يعينها

وهى بحساب الزمن

يادوب ف أخر العشرينات!!..

الفجر سجادة الصلاة

والفرض أبدا ماتسيبوش

الصُبح من قبل الفطار

عَمّالة بتنشّر ف "بُوش"1

الضُهر قلقانة

العيال غايبين ماجوش

العصر بتراجع لهم

أخدتوا إيه ف المدرسة..؟

ف المغربية والمِسا

ح تاكلوا إيه ماتعشيتوش

بعد العَشَا تحكى حكايات!!..

كات طيبة..

دمعة عِنِيها قريّبة

مع إنها..

كات بنت نُكتة مدقرمة

كات مُغرمة

تسمع أغانى الست لما البال يروق

ولا عمرها بصت لفوق

غير بالدعاء

وعليها رقوة م الحسد فيها الشفا

ولا عمرها نطقت بسوء

أمى اللى من ريقها الكلام

سُكر نبات!!..

كانت بتمدح ف السادات

علشان بتقبض م الضمان

ماهو يامّه من خير البلد

مش جيب أبوه

عيب ياولد

ريسنا برضو مهما كان!!..

ماكانتش بتحب السياسة عشان قلق

يابنى اللى يِكبش نار ضرورى بيتحرق

خليك ف حالك

وإرمى همك ع الورق

وبلاش تكون كبش الفِدا

خلينى أموت وأنا حاسة عنك بالرضا

طاب ليه ياغالية كل ده؟!!

هو كده

مابقاش فاضلى ف الحياة

قد اللى فات

ويخيم الصمت اللى متعبى إجابات

ويطول بطول الذكريات

علشان كده.. مابقِتش أقول

إشمعنى أنا اللى أبويا مات!!