وشايل هم احلامك
وايامك
وهم الناس
وفاتح قلبك الكراس
على الدنيا
حبابى عنيك كما الحراس
تدون .. كل اخطاء البشر
وتشيل
ويوم عن يوم
بيتقل حملك المقسوم
وماتكلش
ياصبر الناى على المواويل ..!!
حصاد الدمع متنطور
على النواطير
يبل ف ريق شراقى الصبر
ف المنديل ..!!
عيونك لسه دبلانة
وكحل السهد
مش آخد على النظرة
ولا قادر على التأويل ..!!
ماشفش الضعف جواتك
ومتمكن ولو مرة
وقادر يكسر القنديل ..!!
وبتعافر
كما عهدك مع الأحزان
وبتسافر
واحلامك سفرها طويل ..!!
وحبة ضى من روحك
ف عز العتمة بقايينلك
وحبة فضفضة ف الليل ..!!
لصورة بنت بتحبك
بتفتح للامل طاقة
وترسم للأمانى سبيل ..!!
وماتملش ..
تنام تخاطيف
وتصحى تلاقى حمل سيزيف
على كتافك
وضحكة ثغرها السكر
بتستناك ..
و"صبر جميل" ..!!