الكرامة في السنافي ما تضيع
والردي نعرفْه حق المعرفه
ابتلَشنا في الردي يا اهل البقيع
الشِيَم والدين أزرَت تُوْقِفه
كم نصحنا فيه وعيّا لا يطيع
وكم نمشّيها .. وتمشي دفدفه
كم حملنا داخل القلب الوجيع
وكم دفعنا فوق حق التَكْلفه
كم تغاضينا عن القول الشنيع
والصبر محمود .. وربي يخلفه
لا تصاغر صاحب الصدر الوسيع
ولا تحاول عن مساره تحْرفه
ما سكتنا من ضعافه يا تبيع
الرجل .. ودّه بعِلمْ يشَرّفه
استحينا من هَل القدر الرفيع
لجْلهم .. سمّ الأفاعي نرشفه
لا تظنّك آمن بحصنٍ منيع
الحرامي .. كل صوت يخَوّفه
الذيابة ما تهاب من الصقيع
والبحر ما همّه اللي تغرفه
والرذايل ما يسويها شجيع
ولا يطاطي للشرور وتجرفه
أشهد انّك في ردى طبعك ضليع
إحفظ لسانك .. وقلبك نظّفه
لا تدس السم في القول البديع
وتهدي سمومك علينا مغَلّفه
ولا تحاول تشتري فينا وتبيع
قلل هروجك وخَلّ الفلسفه
خابرينك .. عنز من بدّ القطيع
وبين ايادي الناس مثل المنشفه
والردي يدفع ثمن سوء الصنيع
إيْدْ تحذف به .. وإيْدٍ تلْقَفه
لا تظاهر بالمراجل يا وضيع
وانت في درب الردى اللي تعرفه
الحقايق تسقط الجاني صريع
وما بقى للطير .. غير الرفرفه
لا يضايقْك الصدق .. خلك وديع
ولا تجرّ الصوت ودمعك كفكفه
لا تشبّ النار في فصل الربيع
وبيتْ من صمّ الصخر لا تحذفه
ان تبيها شرّ .. فابشر بي لكيع
وان تبيها طِيْب .. طِيبك تصْرفه
لا نثرت الشوك يرجع لك سريع
ولا زرعت الورد .. وردك تقطفه
بين إيدين الله بنتحاسب جميع
ولا يفيدك عذر ودمعٍ تذرفه
إلعن الشيطان يالغرّ الرضيع
والمغطّى .. إحذر إنَّك تكشفه