آه.. من قلبٍ معنا ما استراح
لاهبٍ في داخل ضلوعه يفوح
كل ما ليل الشقاء أدلج وراح
دكّ في الخفاق غربالٍ يلوح
حظٍ أقشر لاجت الصملات طاح
عجز ما حقق ولو بعض الطموح
إن ركبنا البحر خانتنا الرياح
وإن بغينا القاع ضيعنا الصروح
مانفعنا الصبر وانواع الكفاح
مرمسات العمر زادتنا جروح
والعمر اقفى ولون الشيب لاح
ياربيع العمر.. وقف.. لاتروح
همتي تسمو.. وسدي ما يباح
وعزمي الجبار للعليا.. لحوح
والمشقى لو تتقى بالصياح
ماقدر ينطق ولا يقوى يبوح!!
والتشكي..والتبكي..والنياح
مايعدل ميلة الوقت الشحوح
أختلط صوت الحقيقة بالنباح
واختلط جد الليالي بالمزوح!!
والنجاح إللي يسمونه نجاح
في قواميس.. العناء عندي جنوح
جيت انآ أنشد عن الدرب البراح
أتساءل يابشر من وين اروح
تايهٍ محزون مكسور الجناح
مالقيت إللي مودٍ لي نصوح
وكل داجي ليل يجلاه الصباح
والقوافي المبهمه تبغى وضوح
أسأل الله دوم يرزقنا الفلاح
وارجي الرحمة من الرب السموح