لاهنت يا للي خوتك ترفع الرأس
يابو محمد ياسهيل اليماني
يالصاطي الضرغام ياشبل درباس
طيبك وفعلك يالسنافي دعاني
أنضم بيوتٍ وهجها لاعج الماس
وأكتب حروفٍ ريحها الزعفراني
أصلك عريب وفي المراجل لكم ساس
ماكر حرارٍ من قديم الزماني
ساسِك سليم..وأسسك..سايسٍ ساس
ساسَه..واسس.في المراجل مباني
وتسلسلت نوماسها.. يقرع..اجراس
أصلٍ وفصلٍ من شيوخ قحطاني
أبوك شيخٍ قد سرت عنه الأرماس
ماضنتي مثله يجي مودماني
ملجى ومنصى من شكى الضيم والبأس
من حل في قربه حشى مايعاني
فرز الوغى في الفعل والحلم نبراس
في وصف جوده ما تجود المعاني
أقولها صدقٍ ولانيب بلاس
يشهد بفعله كل قاصي وداني
يادعيج فعله لو يوثق بقرطاس
البوك يتعب والقلم واللساني
ولوكان عمر الخلق بالطيب ينقاس
ماكان نفقد شوفته لو ثواني
فيا الله يالمعبود يامحصي الناس
تجعل مقره في نعيم الجناني
ومالٍ بلا عزٍ بالأقدام ينداس
الذكر يبقى والعمر دوم فاني
ومصاحب الأخيار للفرد نوماس
هذي الحياة وربنا المستعاني
وما هنت ياللي خوتك ترفع الرأس
طيبك وفعلك ياخويي شجاني