حيثك يا بو فارس تثمن معانيه
وانا بطيبك ياعضيدي أباهي
أحرص على رمي الهدف خايف اخطيه
أبي إلى قالو يقولون ناهي
مشاعري ماهيب زيفٍ وتمويه
تصعب على اللي يم دنياه لاهي
اشرب زلال الدهر حلوه وصافيه
وأحتاط من ميلاتها أم الدواهي
وأدور النشمي وأعزه.. واباريه
لاشفت فعل الطيب شد إنتباهي
مثلك يابو فارس ..عسى الرب يحميه
قوله وفعله في المواجيب راهي
وأجنب الضايع ودربٍ مشى فيه
أخشى يدنسني.. وأنا عنه ساهي
واللي يبي العليا يحفر مراقيه
ودرب الشكاله مايبي شخص فاهي