رداً على ماقد ورد من اتهام
واني انا المُغرم وانا معجبّها
ياصاحبي ركز معى حد الختام
خلك من قشور الحكي ..خذ لُبّها
واسمع معي القصة وخلك من كلام
ناس ترى مرضى ندور طبّها
صاحبك مما شاف والله مايلام
ما قبلها ماهو مثل ماعقبّها
الفاتنه اللي فارقه قدر ومقام
قلبي تجاهل ناس ثم رحبّها
صحيح اهي فتنه الى حد الهيام
معجب انا ... ولا ترى ماحبّها
متفردة متميزة ذروة سنام
يالبّى والله حسنها يالبّها
لو شفتها ياصاحبي تُبدي التزام
غصباً عن غرورك وهو ما طبّها
هيبه وتواضع فوضوية بانتظام
قلبي صحى ثم انتشى من سِبّها
هي لذة العطشان والذ الطعام
مثل العسل لو جيت يوم تصبّها
هي حبة التمره بعد وقت الصيام
راح الضماء وعروق من يشربّها
تبتل من طُهر السحابة والغمام
حتى عجمها مايليق تذبّها
كل العذارى حولها وضع إنهزام
والذنب ذنب الغيد ماهو ذنبّها
والمعجبين كثار في وسط الزحام
مثل الرحى تطحن وحنا حبّها
هي فاتنه ومدلله حد الهيام
لولا الحياء او خوفها من ربها
وزود على ماقد سبق فيها احترام
كتلة تميز من سماها لجُبّها
افرح إذا شفت المشاعر باهتمام
وازعل انا لو شفت ناس تسبّها
ورده جميلة لاتُباع ولاتسام
تخاف لاهي تنقطف ولاطفل يلعبّها
هو يفترض ان حبها اصلا حرام
ولو شفت من وده يحب فخبّها
يمنع عليها الحب مع كل الآنام
ومسموح هذا الحب بس لدبّها
تدري من المجني ويُرمى باتهام
المعجب الشاعر وهو ماحبّها