فنجال شوقي يفوح بطيِّب... انفاسك
يا كيفي اللي ليا اشتقتك... تقهويته
أحب اذكِّرْك في صحوتْك... ونعاسك
مادام طاوعْك قلبي يوم... ناديته
تملا يراع الغرام... بصادق إحساسك
واكتب على مملكةْ قلبك: (هنا بيته)
اهديت لك عمري الغالي... فدا راسك
وأنا لغيرك يمين الله... ما اهديته
احذر من الهجر لا يطري... بهوجاسك
والّا يجي منك... علمٍ... ما تهقويته
خل الجفا لا تمادى... في تغطراسك
واحذر توطي مقامك... بعد علّيته
ما جيت عاشق لياقوتك... ولا ماسك
جيتك بمرسال... من قلبك... ولبيته
يا عُود ريان... وسط القلب... مغراسك
سقيته بْدم شرياني... وروَّيته
احرص على قلب حَبك واعرف قْياسك
في عمق حبٍّ تقول انك... تمنيته
وابشر بقلبٍ صدوقٍ يرفض اتعاسك
تنسى معه حُزْنك اللي قبل. عانيته
ويكون لك فرحتَك في العمر وايناسك
ويحيي مشاعرْك،.. وأحاسيسك الميْتة
أنت الملك فيه... والأضلاع حراسك
والأمر والنهي لك... دامك تبنّيته
وان كان ساويتني بالبعض... من ناسك
قلبي عن الشرك انا صنته... وصديته
والله م ارضى يكون الغير... سيّاسك
تجني على القلب لو بالغير.. سٰاويته
انت المخيّر وخذ من راسك عْطاسك
ما ينفع اليا رحلتُ تْقول: يا ليته
وإذا نويت الفراق.. ودقت.. أجراسٰك
صبّرت قلبي... على بعدك... وعزّيته
مادام قهوتْك... حامسها بمحماسك
وفنجالها بالجفا والهجر مدّيته
تجَرَّعه واضرب أرباعك على أخماسك
انته شربته بكيفك... وانت صبيته
إذا انطفى شوق قلبك واعلن إفلاسك
حذفت ماضيك من قلبي وصفّيته
ماني بمجبور أذوق المر من كاسك
وانته تحَمَّل خطاك اللي تجنَّيته
ل أغلقت باب الوفا وأحكمت ترباسك
وأعلنت قطع الوصل واخترت توقيته
وأصبحت مجهول عندك بين جلاسك
وادنيت منك البعيد وقلبي اقصيته
أقول دربك خَضر ماني بحبّاسك
وساقي ورا الشاردة ما عمري اشقيته
وان كنت م أنت بمطاوع فيَّ وسواسك
وباقي على عهدنا... والوعد وفّيته
ماسك على حبنا... بيديك وأضراسك
والصد ماجا على... بالك ولا اطريته
وكنت في دنيتك... نورك ونبراسك
واغريت قلبي بحبك... واستحليته
خذ من ضلوعي قلم والكبد قرطاسك
واكتب على القلب ذا عرشي... توليته
وانت المهندس وأنا راضي.. بهنداسك
حدد مسارك على قلبي... وزاويته
والحبر دمّي وْشغاف القلب... كراسك
وأنا مساري بقلبك...،.ما تعديته
وبداخل العين لو حبيت... مجلاسك
في ظل هدْبٍ لخاطر عينك... أرخيته
ارضي غرورك... وأبدد بالأمل ياسك
واجتث بالحب من قلبك تناهيته
وان هزك الشوق يوم وهب نسناسك
أجيك لو دونك العالم... تحديته