طوّح بي الدمع في دوامة العبرة
سكبته بصمت لكن بان تأثيره
مسحت دمعي وفجأه بانت النبرة
وأطلقت صوتي عسى بإطلالته خيره
الذل ميت وجيتك واطيٍ قبره
ابلعن الخوف لو كثرت جماهيره
ابحرق الطرس لين يخالطه حبره
ابقتل الحرف واستأسر هواميره
يا سيد الجرح لا تزعل ولا تشره
اللي بقلبي صراحه صغت تصويره
الطفلة اللي بقايا أشلاء منتثرة
صحت بقلبي بقايا نزعة الغيرة
الله على قلبها المذبوح يا صبره
كيف يتحمل عذابٍ صعب تفسيره
هذي عليها كبيره لسعة الإبرة
وشلون تحمل جريمة نفس شريرة
ماتت ومات الشموخ بلعنت الكبره
ماتت وماتت سؤال صعب تكفيره
اعزي القلب والقلب انكسر جبره
كني اعزي طفل ماتت عصافيره
يا سيد الجرح يا شينه ويا كبره
تفجر الدم وارتفعت نوافيره
خذها نصيحه ولا تسأل عن الدبرة
يجيك معها سؤال وتنفتح سيره
حكم المقادير ما تنفع به الخبرة
وش سوت دموع هند لسيّد الحيرة
بالقلب مأساة منها نأخذ العبرة
لازم نصحح بعين العقل تصويره
لأن الإنسان لو يولد على الفطرة
يزوره إبليس بإيقاعات مزاميره