ياعين مالك بالسهر زود راحه
نامي وخلي ضايق البال يرتاح
دك الهجوس وكاتم السد باحه
يدعيه هم وخانق الضيق ذبّاح
بوّاح ويل بمرسم الطرق زاحه
رجواه خير ويتقي شر رزّاح
ولكل ليل امجاهدالضيق ناحه
شمات غبن بمزودة..جور ندّاح
بالهمس ظافر سامع السر صاحه
بالسان بُغض ولاهث بكيد نبّاح
وحق الجمل لوقاصم الحمل طاحه
جزر الحداد وناهش الناب لاطاح
للمبغض الشامت مسيرة وقاحه
جلاب عور ويلتمس عذر مزّاح
قل...موت غيض.. ولايدور رباحه
عندي ولاني مرتجي عنده ارباح
يقين قلب الجاهل بشرّ فاحه
والخير أخيروعاقل الضن سبّاح
شكواي كرب وناظر الذمّ شاحه
رغم احتضاري والألم نازع ارواح
ياحرف علمْ امخايل البرق لاحه
صندوق يخفي بالبحر كنز مفتاح
منك العذر يامعتصم والسماحه
بالناس فاس وراشق الدرع برماح
لاهنت ياتاج الوفا ياوشاحه
أنت الذي.. ماهو بأنا.. فيك مدّاح
لك البقا وانت النقا والصراحه
فعلك يبين ومسفرك نور وضّاح
؟أغرق وأنا أعرف بالبحور السباحه
؟!أشرق وأنا صدري بالأمواج طفّاح؟!
عندي رطب؟ أجوع بعذوق واحه
؟يعني أضيق ولي مقاويد نزّاح!!!
بس احتياجي وقت..وقت..و مساحه
وكرسي محطه واختصر قصة اكفاح
تعبت..قلبي يوم تغفا جراحه
وتعبت..يومنّه تحت موس جرّاح
كرهت ليلي..لين يبصر صباحه
واصبحت كاره.. للضيا لين ينزاح
كم غيّ اشوفه ماتبين سلاحه
عجول نصله فوق الأرقاب مسّاح
وادهى وامر الي يسجل نجاحه
ياللأسف نفس الضحيه لسفّاح
كرهت نفسي والعقل والنصاحه
كرهت صمتي زدت في كره الأفصاح
وين الفضا ماعاد بالكون ساحه
معها يطيب ابسجة البال مرواح
ياعين مالك بالسهر زود راحه
نامي وخلي ضايق البال يرتاح