ياعناد اشكي على الله من همومي والعذاب
ويشهد الله من صهيلك ينطرب قلبن عطيب
ليت حزني لا ملكني ينستر تحت الثيياب
مايبين ماخفى للناس والايم يصيب
البلا انه لاغفلني يجعل بوجهي كتاب
ويتحير من قراني لو عرف نفسه لبيب
من يلوم الي غلط لامل من كثر الصواب
شاف من همه عذاب وصار بالدنيا غريب
لام نفسه مايبي يفتح على العذال باب
لا شكى للناس جرح ولا يبي منهم طبيب
اشتكي لله همي واجعل المعنى جواب
والزمن لو طال همه مثل ماودى يجيب
مير انا ممشاي طول مثل من يطرد سراب
لا لقيت الي بغيت ولا حصلي من مجيب
كنت انا لو شفت ذيب وكشر بوجهي بناب
ما حسبت حساب نابه والمخالب لو يشيب
لين شفت الي تركتني شايب بعز الشباب
ماغدت عندي شجاعه طحت من حيلي صويب
احسب ان القلب يصمل في لقاها مايهاب
لين شفت الي تحير منه مقطوع النصيب
بالسلام اختم جوابي ما طلبت اسمع عتاب
جرحي الي ممتلكني يوم والثاني يطيب