حبيبي وحياتي شأكلك بعد
وعلى ذَنّي صدِك لِساني انعكد
مو سَهله آني عندي تجيني وتروح
والأصعب اقَسمَك وإنتَ فَرِد
احساسك اسمعه يِصيحَن تعال
وغَمض عِيوني واجيك ابورد
اذا انت ماي وثلج مشتعل
وِلونك سمار وبياض وتِشِد
لَعَد لو وصفتك ملاك اشيصير
وِلونك حليبي وبياضك زبد
ابمشيتك دريت ابوراك اشيصير
زغير وچبير وشباب او وِلد
بدر شاكر اويه الرصافي اشوف
وشفت فَدعه تركض وريل وحمد
اذا انت طولك خريف وربيع
واصيح العيونك وخصرك يصد
بهدوء انت تحچي البلابل تِغار
وتِظل عالصَدِرهه تدگ وتقد
ضحكتك موسيقى بِقاعة فنون
بتهوفن عزفهه ابنغم مُنفرد
اذا تزعل انت نجوم السماء
وبعض الكواكب احسهه تِهِد
مشكلتي زَعِلتك احسهه هدوء
اشما تحچي انتَ البشر ينسعد
تريد انت جرب وسب انتَ ناس
نَفسهُم يصيحولك الله اعد