ما خنت ابنظر عندي اليباوع عيب
أصلاً واليحب غير اليحب شيشوف
مو شرط بجسد إلا اليخون يخون
اكو بنية البشر نوبات تلگة ازروف
لو گايل بعت وكت الچنت شَراي
مارخصت سوگي ولاچنت مَصروف
لوحاچيلي نَسمه ولاتُمرني تراب
عاشرتك چنت ماعاشرتلي اطيوف
شمدريني الشمس ماتستحي امن الليل
والمخَمَر وجه بعيونه چم نفنوف
من شفت الحچي يگص الگصيبه ابريل
عرفت آني اليسافر ماتمنعه ازلوف
فرق بين الحضن لمَن عِرف تلگيه
وفرق نفس الحضن تلگاه مامألوف
وفرق مابين دمعة وتتچي اعله الشوف
ومابين التظل بجروح رمشي تروف
انه مدخْنَك صور بس شامك حسرات
يل شامر دمعتي ابين كوم اگطوف
سرك والسوالف عايشات ابراس
ماصَبَح صُبُح وحجابهن مكشوف
من گتلك احبك حَسَبتهه ادوم
ماشيتك نهر وبحساسي تمشي اجروف
ضَحيت بوكت بس للضحية العيد
بوكت الناس تظحك چنت اجر الاوف
من صوتك رُفَع حسيت نيتك ناي
من مگفاك چنت ادريك راح اتعوف
تحاسبني اعله ضرفي المامليته اوياي
موكسفة شمس من موقفك مكسوف
ال يطبگ باب گلبه شيفتهم عالطير
والبابه جرس مايدري شنهي اچفوف
ال مزعله الهوه يغرگ ابحضن الماي
وبس يسمع بأمه أتذب خبزهه يطوف
محتاجك گبل لمن چنت جناز
مو عازة ورد محتاج آني اچتوف
تانيتك تمر وعگدلك الخطوات
وطلگلك ادية والنفس مچتوف
كلشي ولا امر من بابكم فد يوم
ومن طعم الهلاهل افتهم مزفوف