الا يا ليتني مثلك واغنيها على اطْرف عود
ولادْري عن همومٍ عشعشت بالصدر يالقمري
همومٍ لازمتني من بداية عمري المقرود
وْتكاثر كل ماكْبر لين ادخلها معي قبري
تمسيني تصبحني كأني بالشقا موعود
على جلسة ألم تحرق بقايا من أمل عمري
تطاردني وادافعها واساءل ربي المعبود
يكافيني شرور الفتنه اللي ظلّمت فجري
عقارب طينة الوادي تدسّ السم لي ف ورود
خناجر تبتسم تخفي وراها طعنة الغدري
لها حلمي مناعة عن خطرها لو تزود يزود
وْلها لا ضاق بي صدري يسليني لحن شعري
طوتني والحزن طوي الفتيله وسطها البارود
لها صبري زنادٍ تشتعل به لو نفد صبري
ولا يالهاجس المجنون لو ان الحبل معقود
يجيب العلم من لا يشتقي به وانت ما تدري
ولا يالصبر لو بانت مواريها حجج وشهود
دخيلك لا تأثر لو تشب النار في صدري
وانا والله طول العمر مخفيها عن المنقود
وْعيون الناس شافتها وباح الصدر من قهري
على مرّ الزمن تبقى الأسود وفعلها مشهود
ولا عمر الرخم لو طار عالي يشبه الصقري
ردي الفعل ماهو بحيّ لو انه بقى موجود
وْرجال العز لو تموت تبقى بْطيّب الذكري
ولا يالشجره الخضرا ولو العرق ناشه دود
يكفّيني ظلالك وآخذ لْعرق الغثا حذري
على عز وفخر تبقين لو ان الليالي سود
ولا هزّت كياني ظلمته عندي كما البدري