عشان بحبك..
أحلامي.. لما خاصمتها..
رجعت لي أخطب ودها
لملِمتها
في عينيك بسرعة حجبتها
وشطبت جوه مني،
ألف شوقه للرحيل
وألف ألف للوداع!
عشان بحبك
حبيت حياتي
وركزت خالص في اللي آتي
وبقيت معاك احلم ليلاتي،
بفرح يِّبْدِل دُنيتي
ويمسح أهاتي
ه تقولي مش فاهم.. ه أقولك،
مِنا مين
للدنيا فاهم والا راضي؟!
ليه ه نحزن م الحياة.. والحب..
رحمة للدنيا ومشاع؟!
عشان بحبَك
طلَبت مِنْ روحي تسمي
تصون وفائي،وِنبض خِلي
وتخُدنِي لِيه ببراءتي اللي،
صُنتها.. من ليل زماني
لما شال فيا وباع
عشان بحِبَك
قلت أسامح
اللي ياما قالوا عني
إني جانية واللي اللي
واللي جانى.. كان زماني!
الله يسامح اللي شاع!
عشان بحبك
قلت أعاتبك
باللي حَزِنْ قلبي منك
أن غيري كتير، وإنك..
تأمرُه.. وأمرك يُطاع!
عشان بحبك
صُنت نفسي حتى مِنك
لجل رب الكون يِعِينِي
لمَا أقول لُه يارب قَرَبْ..
بالحلال بيننا المتاعِ
عشان بحبك
مش ه أداري مشاعري عنك
ولجل ما تفهمني أكتر..
الغلط مش طبع فيا
أنت فيا بأمر ربي
واللي يرضىَّ بأمر ربُه،
لابُد ما يلبيه بإيمان
واقتناع
عشان بحبك
ه أستنى ردك
أبعت لي قولي..
ه نلتقي على بر والا،
كل شيء في الحلم ضاع؟