يمكن تهورت بأشواقي وبث الشجون
والا رميت الهدف وأخطيت في رميته
إيه الهوى والمحبة ماتبي ميكرفون
تبقى كما السر والواجب علي كميته
اسمه هوى والهوى تركع من أجله غصون
مهما اختلف شكل عوده واختلف نميته
يميل مع هبة النسناس وأما السكون
شريانه وجذره الثابت سقى ضميته
فتون ويح المشاعر من سبايب فتون
اللي عليها فؤادي يمشي بعميته
اهديت لك قلب صافي ميزته ما يخون
براءة الطفل مع دبه ومع دميته
لرضاك وصلت خفاقي لحد الجنون
وأوصيته إن لاح غيرك يبتدي حميته
من خلف قضبان حبك في ظلام السجون
يرجي حقوق السحايب تنسكب هميته
وإن ما ملكتي مع البرواز قلبٍ حنون
يستاهل المتحف وما يحتوي طميته