ثوبي كفن وظلم الأيام تابوت
دنياي سوّت بي كذا ليه مدري ؟
كم لي وأنا مسافر على رحلة الموت
تعبت أدوّر وين محفور قبري
كل وجه أشوفه يبتسم وجه حانوت
وكل المدامع مابكت غير عمري
كذب السنابل تسمعه شجرة التوت
والحيّ عيا ماسمع ويش عذري
أنا الضياع اللي سكن جلد هلفوت
وأنا الوحيد اللي ملايين كثري
كنت الصغير اللي بنا برجه الحوت
والحوت مات وبرجه ماعاد كبري
أعوام أشيل أبداخلي جمر مكتوت
مليت أشيله داخل ضلوع صدري
كل يوم أقول الهم لحظات ويفوت
واللي يفوت اليوم ولا فاد صبري
تطري عليّ أشياء كثيره بلاصوت
ودّم الغريب اللي إندفن معه سري
منظر عذاب بلوحة العين منحوت
واللي يبرّوز لوحة الحزن فكري
صرت أحسد المجنون وأقول مبخوت
عذره معه لو قال قالوا يهذري
تعبت وحيلي أنهد والغصن محتوت
سنين وحملي يشتعل فوق ظهري
يسقط من أيدين المسا أنسان مفتوت
وألمّلمّه وأنسى بعض منه وأسري
أجزاء مني واضحه وجزء مبهوت
يلقاني اللي يدرس بيوت شعري
ياموت تكفى أشتقتلك حيل ياموت
ودي أضمك وأحضنك وسط قبري