قلتي
استنىَ
بكره أهو جاى
ييجى وجايب
لو
كان جاى
إستنيت
فاتني صبايا
فاتني شبابي
فاتت
فرصة عزوة وبيت
كل ربيع عداني
ما هَدىَ
حتى ما
يسمع منى سؤال
وكل خريف
في سنينى الماضية
عندي استني
كان
ابن حلال!
يحلف أبداً
ما يفوتنيش
وحدك دايماً؟
لاء ما تجيش!!!
جنبك انا
وياكِ حأعيش
دا اللى ناقصنى
سنه ورا سنه
وبدال ما أستنى
بطولى
لقتنى
وعلى أكتافى
كهولة جيش
ده غلبان
ده عدمان
دا كبير حبه
دا عنده جنان
وفلان ده:
خلقته طالحة
طب
صُدى يا فالحة
مش كان أحسن
لو بقليلك
كنتى رضيتى
حتى إن كانت
أكلته علقم
ولا إن كانت
مايته مالحة؟!
أنتي أخترتى
تطمعي حبه
وتكبرى حبه
لما
في عمرك
ما بقاش حبه
عيني عليكى
بختك ناحس
واسمك
بعد دا كله أتغير
وبقى
العانس